Kryeministri Rama ka qenë sot në Laç për të takuar banorët e prekur nga tërmeti i 26 nëntorit.
Ai zgjodhi një nga lokalet e dëmtuara nga tërmeti për të zhvilluar bisedat me qytetarët por kësaj here qytetarët ishin të shumtë në numër dhe me një mori pyetjesh për kryeministrin të cilit jo pak herë i është dashur të ngrejë zërin.
Batutat me qytetarët nisën që në fillim të takimit ku Rama u ankua për duhanpirjen brenda ambienteve të lokalit.
“O zotëri nuk pihet duhan këtu, hiqe atë se është shkelje ligji. (u drejtohet disa djemve në derë) a ka mundësi të dilni pak jashtë se e bëtë këtu, dilni nuk pihet cigare këtu!”
Më pas ai debatoi me disa prej banorëve të cilët kërkonin informacion për ndërtimin dhe restaurimin e banesave të tyre.
“Mos ma përmend më copën e bukës… shqiptarët nuk punojnë për copën e bukës. Shih si je ti, si je veshur, ti s’punon për copën e bukës se më vjen të plas, as në Mesjetë shqiptarët s’punuan për copën e bukës.
Unë punoj 22 orë në ditë, se më hipën gjaku në kokë kur thoni punojmë për copë të bukës. Ore siç ka ndodhur këtë herë, s’ka ndodhur kurrë në Shqipëri, boll se të dëgjon Zoti, kaq. 10 ditë gjithë ky tërmet në hotele, në çadra dimërore.”, iu drejtua kryeministri një qytetareje që punonte në Zvicër dhe kishte ardhur për t’u interesuar për shtëpinë e familjarëve të saj.
Nuk munguan në këtë takim edhe komente raciste të kryeministrit pasi i vuri epitetin ‘i ziu’ një qytetari të komunitetit rom.
Rama: Bjere çik atë të ziun, ku iku ai? Ku është ai i ziu mër, nga më iku?
Burri vjen dhe kryeministri i jep çelësat e hoteli për nënën e tij!
Burri: Faleminderit shumë
Rama: Merri çelësat, çojë plakën në hotel!
Në mesin e kërkesave për Ramën kishte dhe nga ata qytetarë të cilët iu drejtuan duke i thënë se kishin familjarët pa punë dhe kishin mbetur ‘pa bukë’.
Pjesë nga debati
Burri: Jam socialist, demokratët e qelbur më kanë hequr nusen nga puna…
Rama: Lëre këtë muhabet tani
Burri: Më ke djeg nusen, ma ke heq nga puna nusen dhe është në shtëpi
Rama: O zotëri të lutem shumë mbylle këtë muhabet, unë nuk heq njëri nga punë. Lëri këto, demokrat i qelbur, demokrat kështu e ashtu.
Burri: Është pa bukë, o kryeministër, është pa bukë! Ka fëmijë dhe ka ngelur pa puna
Rama: A ka mundësi ta mbyllësh tani? Ik e largohu na lër rehat. Lëri këto muhabet, unë po them nuk heq njeri nga puna e nuk fus njeri në punë. S’kam ardhur për nusen tënde këtu.
Burri: Po të them që është pa bukë
Rama: Nusja të dalë ta gjejë vetë punë, jo të dalë vjehrri të kërkojë punë për nusen.
Teksa qytetarët kërkonin fjalën për ti bërë pyetje kryeministrit, ai u ngrit dhe u shpreh se nuk kishte më kohë pasi e priste ministrin e Jashtëm italian Di Maio.
“Po çfarë keni mor Zot, më çmendët”, dëgjohej të thoshte Rama teksa largohej në grumbullin e qytetarëve. /Opinion.al
