Një termet i fortë u ndje mbrëmjen e sotme në gjithë Shqipërinë jugore. Në Gjirokastër kryesisht, Sarandë, Vlorë, Delvinë, Korçë, etj. qytetarët thanë se kanë dalë nga shtëpitë pasi ka patur lëkundje dhe paslëkundje që jo vetëm kanë qenë të forta por janë zgjatur në kohë. Tërmeti është ndjerë deri në Tiranë e Durrës.
Siç shihet në faqen online të qendrës së termeteve epiqendra ka qenë në Kalpáki, Epirus që ndodhet 30 km larg nga Kakavija.
Deri tani nuk ka raportime për dëme edhe pse është ende shpejt për konstatime.
“Po mbajmë kontakt me shërbimet e emergjencës civile greke, për të konstatuar dëmet e shkaktuara në zonën e Janinës. Po marrim informacione të vazhdueshme nga Qendra Kombëtare e Emergjencave Civile dhe në fakt, nga informacionet ka panik nga qytetarët, por nuk ka dëme nga ky tërmet”, ka deklarur kreu i Emergjencave Civile Shensi Prençi. Gjithashtu ai këshilloi të shmangen banesat e amortizuara, për t’i paraprirë kështu lëkundjeve të dyta apo të treta nga tërmeti.
Ai shtoi gjithashtu se bashkitë dhe prefekturat e prekura nga lëkundjet po raportojnë për situatën.
Prençi tha se ende nuk ka informacione të detajuara nëse tërmeti ka shkaktuar dëme njerëzore apo materiale në Greqinë Veriore, aty ku ishte edhe epiqendra e tij.
“Në Greqi tërmeti është raportuar 5.6 ballë shkalla rihter. Por ende nuk kemi informacione nëse ka dëme të shkaktuara atje”, tha Prençi.
