Pas lëkundjeve të tërmetit në juglindje të Shqipërisë, me rajonin e Korçës të prekur më rëndë, ka reaguar përmes disa mesazheve në Tëitter, kreu i Partisë Demokratike Lulzim Basha.
“Qindra banesa janë dëmtuar nga tërmeti që goditi në orët e para të mëngjesit rajonin e Korçës. Shumë banorë kanë mbetur në qiell të hapur dhe qindra të tjerë janë në panik se çfarë do të ndodhë me banesat e tyre. Gjithçka kishin ndërtuar me sakrificë të madhe është shkatërruar”, shkruan Basha.
Për këtë situatë, ai kërkon që të shpallet gjendja e jashtëzakonshme.
“Duhet shpallur gjendja e jashtëzakonshme në zonën e goditur për të dedikuar urgjent fonde për shtëpitë e dëmtuara. Nuk duhet humbur asnjë çast për shkak të paaftësisë apo lojërave politike, por duhet vepruar menjëherë me fonde e veprime konkrete për të ndihmuar banorët e goditur”, thekson Basha.
Sipas tij, familjeve të mbetura në mes të 4 rrugëve dhe në gjendje tronditjeje e pamundësie totale, shteti duhet t’iu ofrojë menjëherë ndihmë financiare dhe ushqim e strehim.
Një seri goditjesh tërmeti u regjistruan mëngjesin e së shtunës në Shqipëri, në juglindje të vendit, në zonën e Korçës. Sipas të dhënave nga Instituti i Gjeoshkencës, ato arritën në një intensitet prej 5.3 gradësh të Shkallës Richter, me epiqendër rreth 17 kilometra në jug dhe jug lindje të Korçës, dhe zgjatën në një interval prej gati dy orësh nga 04:26 deri në 06:20 minuta kur është regjitruar goditja e fundit me intensitet më të lartë, e pasuar dhe në orët në vijim nga lëkundje të tjera.
Të paktën 4 persona rezultojnë të jenë lënduar nga dëmet në banesat e tyre. Sipas të dhënave zyrtare ata janë paraqitur “në urgjencën e spitalit për të marrë ndihmën e parë pasi nga rënia e mureve të disa banesave, kanë pësuar lëndime të lehta. Dy prej tyre kanë marrë ndihmën e shpejtë në spital”.
Ministria e Mbrotjes bën të ditur se janë disa dhjetra banesa të dëmtuara në disa fshatra të zonës. Bilanci deri në mesditë flet për çarje muresh, shembje çatie dhe shembje suvash në 70 shtëpi në fshatin Floq dhe Dvoran, nga të cilat sipas të dhënave zyrtare “50 banesa janë të vjetra dhe të pa banuara prej shumë vitesh”. Po ashtu në fshatin Qafëzezë janë të dëmtuara nga tërmeti 10 banesa, ndërsa në fshatin Vidohovë kanë pësuar çarje të mureve 20 banesa të vjetra./ Opinion.al
