Qeveria shqiptare do të mbulojë shpenzimet për kthimin e trupit të 34 vjeçarit, Erjon Toro, i cili humbi jetën si pasoje e tërmetit që goditi Italinë Qëndrore dy ditë më parë.
Kryetarja e Bashkisë së Roskovecit, Majlinda Bufi ka bërë me dije se qeveria ka marrë përsipër të gjitha shpenzimet për të sjellë trupin e të riut në fshatin Kurjan të Fierit.
“Ambasada shqiptare në Itali po punon për përmbylljen e të gjitha procedurave, për nisjen e trupit në Shqipëri”, tha Bufi.
Erjon Toro u gjet i pajetë mëngjesin e 24 gushtit nën gërmadhat e shtëpisë së tij në Amatrice, qytezë që u rrafshua pothuajse tërësisht nga tërmeti. Dramës së familjes Toro i shtohet plagosja e bashkëshortes së Erjonit, e cila ka humbur të dyja këmbët. I vetmi ngushëllim për ta është fakti se të dyja vajzat e mitura të Erjonit, 9 dhe 4 vjeçe, kanë shpëtuar mrekullisht.
Toro jetonte prej 16 vitesh në Itali, bashkë me familjen e tij, ku punonte në ndërtim.
Si pasojë e tërmetit 6.2 ballë që goditi Italinë Qendrore në orën 3:36 të së mërkurës humbën jetën 268 persona dhe u plagosën shumë të tjerë. Erjon Toro ishte i vetmi shqiptar që humbi jetën
