Pas tërmetit të fuqishëm që ra sot në mëngjes dhe shkaktoi panik tek qytetarët, lëkundje të tjera të fuqishme u ndjen vetëm pak minuta më parë. Sipas të dhënave sizmiologjike, lëkundja sizmike ka qenë me magnitudë 3.5 me epiqendër 23 kilometra nga Tirana dhe 8 kilometra nga Fushë-Kruja. Tërmeti ka rënë në një thellësi prej 10 km nëntokë. Ky është tërmeti i shtatë në radhë që ka rënë gjatë ditës së sotme. Tërmeti i parë i fuqishëm shkaktoi dëme të lehta materiale në shumë zona të vendit. Epiqendra ishte në zonën e Durrësit.
Paniku ishte i madh nga lëvizjet e forta të tokës. Ato janë ndjerë me fuqi mbi 6 ballë në Tiranë. Rrugët e qyteteve afër epiqendrës janë mbushur me njerëzit që kanë dalë të frikësuar nga ndërtesat.
“U ndje goxha dhe zbritëm poshtë”, – thotë një djalë.
“Fatmirësisht ishim në katin e tretë dhe nuk i ndjemë shumë lëkundjet. Imagjino sikur të isha në katin e fundit, do të ishte edhe më e frikshme. Tani do të kthehemi mbrapsht sepse mendojmë se situata u qetësua. Shpresojmë të mos ketë lëkundje të tjera”, – shprehet një shtetase e huaj.
“Dolëm sepse tërmetet zakonisht përsëriten. Po presim jashtë për momentin”, – thotë dikush tjetër.
