Kryeministri Edi Rama, ka takuar mbrëmjen e sotme të mbijetuarit e familjes Çupi. Tërmetit tragjik të 26 nëntorit, i mbijetoi vetëm Aleks Çupi, ndërsa tre pjesëtarët e familjes së tij, babai, nëna dhe vëllai humbën jetën nën rrënoja.
31-vjeçari kishte ardhur nga Greqia për të zyrtarizuar lidhjen e tij të dashurisë, por gëzimi i tij u kthye në tragjedi pasi pallati 6-katësh ku jetonte prej vitesh familja u shemb.
Për shkak të tërmetit 6.4 ballë, Aleksi mori disa lëndime dhe qëndroi për disa ditë në spital, aktualisht gjendja e tij është e mirë. Ndërkohë, ditën e sotme Aleks Çupi është transferuar në banesën e tij të re në Kamzës, ku është vizituar dhe nga kryeministri Edi Rama.
Rama i shprehu ngushëllime për humbjen e njerëzve të dashur Aleksit, ndërsa u njoh nga afër me gjendjen e tij shëndetësore. Gjatë bashkëbisedimit me Aleksin dhe familjarët e tij, Rama tha se njeriu do të jepte çdo gjë të kishte pranë familjarët e tij, ndërsa shtoi se; “njerëzit harrojnë dhimbjen”.
BISEDA
Rama: Ngushëllime për humbjet. Më e keqja kaloi??
Aleksi: Po, po kaloi.
Rama: Ku e ke shqetësimin?
Aleksi: Vetëm të këmba
Rama: Hajde ulu këto (i thotë një gruaje). Apo ke frikë nga unë?
Aleksi: Dhimbjen duhet ta kthejmë në forcë.
Rama: Shtëpia më duket e mirë
Aleksi: Po shumë mirë
Rama: Ta gëzoni dhe të keni vetëm momente të mira.
Ndërhyjnë familjarët: Ajo është e fejuara
Rama: E pash e pash.
Rama: Faleminderit për fjalët e mira. Ne këto punë kemi. Në këto kushte është shumë e rëndë dhe gjendesh pranë diçkaje e që se pranon dot. Ajo çka mund të bësh është që të qash hallin që mund të qahet, se tjetër s’ke ça bën. Unë thash; brenda datës 15 dhjetor familjet që e kaluan më keq se të tjerat do të ishin në banesa. Do të çoj dhe atë Kristiano Ronaldon në shkollë, dhe jeta vazhdon. Pastaj janë gjithë ato shtëpi për të rindërtuar. Ata që humbën shtëpinë…e kanë më të lehtë se ata që humbën njerëzit. Njeriu është bërë që mund të harrojë të keqen. Kur përballesh me humbjen e njeriut thua; “ore i kam fal të gjitha. I fal të gjitha vetëm që mos të më ikë njeriu që kam”. Mirëpo njerëzit harrojnë, kështu është bërë kjo jetë.
Nusja e shtëpisë qeras Ramën me karamele
Rama: Faleminderit nuses së shtëpisë, nuk ia prishim./ Opinion.al
