Tërmeti që ka goditur sot në ora 11.02 Shqipërinë ka qenë aq i fortë saqë ka sjellë panik në Tiranë.
Të shumtë kanë qenë ata që kanë dalë duke vrapuar jashtë godinave, përfshi këtu edhe deputetët dhe punonjësit e administratës. Madje në kryesinë e Kuvendit tërmeti ka sjellë dhe disa të çara në godinë, ndërsa deputetët që merrnin pjesë në seancat e komisioneve kanë dalë jashtë ambienteve të Kuvendit.
Lëkundjet kanë qenë aq të forta saqë edhe punonjësit e kryeministrisë dhe të disa institucioneve e sipërmarrjeve private rreth këtij ansambli ndërtimesh, kanë dalë menjëherë nga godina, ashtu siç tregon dhe fotoja e mëposhtme.
Sizmiologu Rrapo Ormeni në një lidhje telefonike për “Neës24”, deklaroi se pas tërmetit të fuqishëm që goditi më parë, do të vazhdojë të ketë tërmete të tjerë, më të vegjël. Ormeni tha se si pasojë e prishjes së ekuilibrave, do të ketë lëkundje të tjera, por me magnitudë të vogël.
“Tërmeti ishte rreth 30 km në veriperëndim të Tiranës, 18 km në verilindje të Durrësit, 6 ballë me magnitudë 5.1 e shkallës rihter. Tërmeti është shoqëruar edhe me një seri lëkundjesh, me 22 të tilla. Këto janë tërmet të nivelit mesatar. Ato shoqërohen me pasgoditje dhe lëkundje të tjera më të vogla, pasi është prishur ekuilibri. Ky çlirim energjie, pritet të sjell lëkundje të vogla”, – u shpreh Ormeni.
