Një tërmet me magnitudë 4.6 ballë i shkallës rihter ka goditur dje rreth mesnatës Italinë Jugore.
Sipas Ansa.it, epiqendra ishte në Montagano pak kilometra nga Campobasso, ndërsa tërmeti kishte një thellësi prej 23 kilometrash.
Po ashtu mediat italiane shkruajnë se prej ditësh nëntoka e Molizës ka regjistruar lëkundje të vogla të ndjera nga popullata. Por lëkundja e regjistruar mbrëmjen e djeshme ka shkaktuar panik. Njerëzit kanë dalë nga banesat e tyre në rrugë, të tjerë kanë fjetur në makina.
Tërmeti, i cili duket se nuk ka shkaktuar dëme përveç disa rrënojave të rëna, është ndjerë edhe në zonat fqinje, në provincën e Isernia-s dhe në zonën e Kazertës së Epërme, në Napoli, por edhe në zonën e Benevento-s dhe në të gjithë Abruzzo-n.
Kryebashkiaku i Montaganos, Giuseppe Tullo ka thënë: “Goditja është ndjerë shumë e fortë. Shkollat e zonës Petrella, Matricë dhe çerdhja do të mbyllen”.
