Ka shkuar në 24 viktima dhe 450 të plagosur bilanci tragjik nga tërmeti i fuqishëm që goditi verilindjen e Pakistanit ditën e martë.
Tërmeti 5.8 ballë me epiqendër në Punxhab, në kufi me Kashmirin u ndje në shumë zona të vendit dhe si pasojë qindra banesa u shkatërruan dhe dëme të mëdha u shënuan dhe në infrastrukturë, veçanërisht në rrugë, në kullat e linjave telefonike dhe ato të energjisë elektrike.
Tre ura u shembën në qytetet Jhelum dhe Mirpur duke penguar dhe ndihmat për banorët e zonës, ndërsa operacionet e shpëtimit u vështirësuan dhe më shumë për shkak të reshjeve të dendura që përfshinë rajonin.
Kryeministri Imran Khan, i cili ndodhet në Nju Jork për Asamblenë e Përgjithshme të Kombeve të Bashkuara, shprehu dhimbjen për viktimat dhe urdhëroi asistencë të menjëhershme për popullsinë në vështirësi./Opinion.al
