Ministrja e Mbrojtjes Olta Xhaçka në një dalje publike për mediat bëri një pasqyrim të të gjithë situatës në vend pas tërmeteve. Sipas Xhaçkës situata sizmike duket se e ka kaluar momentin e saj më të rrezikshëm, ndaj është shumë e rëndësishme që të gjithë së bashku t’i rikthehemi normalitetit.
“24 orët e fundit kanë qenë shumë të vështira për të gjithë ne. Kanë qenë ore të një lodhje jo thjesht fizike, por edhe psikologjike. Dhe besoj që në momente si këto është më e rëndësishme se kurrë, që qytetarët të jenë të informuar për atë që po ndodh, dhe të kenë një pasqyrë sa më të qartë të të gjithë situatës,” tha Xhaçka.
Ministrja theksoi se dëmet kanë qenë shumë më modeste sesa mund të ishin pritur nga një tërmet i atyre përmasave, dhe nuk ka pasur asnjë rast lëndimi serioz të qytetarëve.
Xhaçka theksoi se institucionet janë në krye të detyrës dhe se banorët e prekur janë ndihmuar me psikologë dhe me çdo ndihmë tjetër që ata kanë pasur nevojë. Ajo theksoi se po kryhet procesi i verifikimit për çdo ndërtesë dhe se në bazë të verifikimeve, autoritetet do marrin masat që duhen.
Po ashtu, ministrja Xhaçka deklaroi se autoritetet iu janë gjendur afër edhe fëmijëve e se Ministria e Arsimit vendosi që nesër shkollat, kopshtet dhe çerdhet të jenë pushim./Opinion.al
