Pas tërmetit 5.8 ballë që goditi ditën e sotme Shqipërinë, Lëvizja Socialiste për Integrim ka kërkuar shpalljen e emergjencës kombëtare.
Përmes një postimi në “Facebook”, ish-deputetja e LSI-së Kejdi Mehmetaj, është shprehur se qeveria ende nuk ka marrë masat e nevojshme për persona të cilët kanë dalë në rrugë për shkak të frikës nga tërmeti.
Sipas saj, deri më tani nuk është marrë asnjë masë për t’u ardhur në ndihmë personave të lënduar.
“Ndërkohë që qytetarët e Tiranës edhe Durrësit janë rrugëve në panik, e vetmja masë e marrë që lajmërohet nga qeveria është anulimi i një udhëtimi të Ramës.As shpallja e emergjencës kombëtare, as ndihmë në terren për familjet e dëmtuara, as informacion për qytetarët si të kujdesen për veten. Ku janë zonjat ministre që bënin humor në parlament, si do justifikohen para shqiptarëve, ku do gjenden fondet për të dëmshpërblyer familjet? Urojmë që të mos ketë më lëkundje e dëmet të jenë të pakta, ndërsa lutemi për shëndetin e 30 qytetarëve të plagosur ?? Ps. Ndërkohë në Teatrin e “rrezikshëm” Kombëtar nuk është thyer asnjë xham!”, shkruan Mehmetaj.
Shqipëria u godit sot nga tre tërmete, ku më i fuqishmi ishte 5.8 ballë, i cili shkaktoi persona të lënduar si dhe dëme materiale të shumta në disa qytetet të vendit./ Opinion.al E.Xh.
