Një tërmet relativisht i fortë ka goditur pak pas mesnate zonën e Librazhdit, por që është ndjerë edhe në Elbasan dhe Tiranë. Sizmiologu, Rrapo Ermeni në një prononcim për Opinion.al sqaroi se ka patur 2-3 lëkundje, në orët e para të ditës së sotme, nga ora 00:20 deri 1.59.
Ai sqaroi se goditja më e fortë, 4.2 e shkallës Rihter ndodhi në orën 00:20 me epiqndër 15 km në verilindje të Librazhdit. (zonë malore). Ky tërmet është ndjerë 5 ballë në epiqendër, dhe më i vogël, rreth 4 ballë në zonat e banuara.
Më pas kanë ndodhur edhe dy pasgoditje përkatësisht, 2.3 dhe 2.2 të shkallës Rihter.
I pyetur nga Opinion.al, sizmiologu Ermeni tha se ky nuk konsiderohet një termet i rrezikshëm. Sidoqoftë lëkundjet janë ndjerë në gjithë zonat e Librazhdit, të Elbasanit dhe të Tiranës. Nuk raportohet asnjë dëm nga emergjencat civile, të paktën deri tani. (ora 09:30)
Ndërkohë lidhur me zonat me risk më të lartë për tu goditur nga termetet, sizmiologu tha se është pikërisht kjo zonë. Por ai qetësoi, kur tha se janë procese të zakonshme, dhe s’ka arsye për tu shqetësuar.
“Gjatë viteve të fundit zonat më aktive tektonike jane verejtur në qarqet Elbasan dhe Dibër”, u shpreh sizmiologu Rrapo Ermeni.
/R.Dedaj.Opinion.al
