“Tërhiqu nga tenderi që ke fituar ose do të vrasim ty dhe djalin tënd”. Ky mesazh mbërriti në telefonin e biznesmenit, Eral Myftaraj nga personat të kontraktuar nga Shaqir Alcani, konkurrent në një garë prokurorimi publik për blerjen e lëndëve drusore në Bashkinë e Tiranës.
Ishte vetë biznesmeni Myftaraj që kallëzoi rastin në Policinë e Elbasanit pak javë më parë.
Hetimet e nisura pas denoncimit verifikuan versionin e tij dhe policia arrestoi sipërmarrësin Shaqir Alcani, djalin e tij Algertin dhe shtetasin Edmir Boci.
Policia thotë se Boci së bashku me një person tjetër me incialet L.K. ishin kontraktuar nga biznesmeni Alcani për t’i bërë presion konkurrentit të tij, që të hiqte dorë nga tenderi i zhvilluar në Tetor të 2022.
Vlera e tenderit të fituar nga Eral Myftaraj kap shifrën e 41.220.000 lekëve. Krahas mesazheve biznesmeni i kompanisë me seli në Cërrik, është takuar dhe fizikisht gjatë disa takimeve të zhvilluara në Tiranë me personat e kontraktuar nga Shaqir Alcani. Pavarësisht kanosjes së vazhdueshme, Eral Myftaraj nuk ka pranuar të tërhiqet.
Pas arrestimit të 3 personave policia sekuestroi dhe 8 aparate celularë, përmes të cilave janë dërguar dhe mesazhet kërcënuese.
Ndërsa kërkimet vijojnë për shtetasin me inicialet L.K, i cili ka mundur të zhduket pa lënë gjurmë.
Tv Klan
