Një nga kandidatët për tu bërë pjesë e Strukturës së Posaçme Antikorrupsion është tërhequr sot nga gara. Bëhet fjalë për Prokurorin e Dibrës, Shkëlzen Cena, i cili ka paraqitur pranë Këshillit të Lartë të Prokurorisë kërkesën për t’u tërhequr nga gara. Ai nuk ka dhënë ende arsye për marrjen e këtij vendimi.
Në seancën dëgjimore të KPK më 5 qershor Shkëlzen Cena, u gjet me probleme të pasurisë, kryesisht mbi një kredi të marrë për një shtëpi, një kontratë noteriale për të cilën kishte qëndrime kontradiktore, një makinë për të cilën ishin nënshkruar dy kontrata dhe mungesë burimesh financiare për disa vite.
Cena po ashtu u gjet me probleme sa i përket disa hetimeve që kishte ndjekur, kryesisht me të akuzuar për kontrabandë. Ndaj tij po ashtu pati një raport negativ nga Drejtoria e Sigurimit të Informacionit të Klasifikuar sipas të cilit kishte dyshime se ai ishte përfshirë në korrupsion pasive dhe se kishte kontakte të papërshtatshme. Cena i mohoi akuzat për korrupsion dhe kërkoi konfirmimin në detyrë. /Opinion.al
