Deputeti i opozitës parlamentare, Halit Valteri, ka shprehur qëndrimin e tij kundër raportit të Komisionit Hetimor për shkarkimin e presidentit Ilir Meta.
Valteri ka hedhur akuza në adresë të Metës dhe po ashtu edhe gjithë deputetëve të mazhorancës.
Ai ka akuzuar deputetët se mbyllën sytë para shkeljes së rëndë të zhdekretimit të 30 qershorit nga ana e Metës, ndërkohë që thekson se ai flet hapur, pasi nuk i trembet askujt.
“Nuk ka gjë më të tmerrshme dhe djall se deputeti absurd se ashtu jeni kthyer që nga 2008. Çfarë do ti thuash presidentit kur firmos një dekret që është zhdekretim, askund nuk ka një të tillë, nëse e gjeni ma thoni dhe unë e mbyll gojën. Për ju një vit më parë, ai ishte atentat ndaj demokracisë, por sot një vit më pas, Ulsi Manja ka tjetër mendim. Për shkak se nuk ishit të aftë ta çonit Metën para përgjegjësisë e ngatërruat çështjen e 30 qershorit me emërimin e anëtarëve të gjykatës kushtetues, sot akuzat janë zbutur në çështje procedurale që nuk ka të bëjë me firmën e tij për rrëzimin e 30 qershorit. SHBA e shpëtuan vendin nga gjakderdhja, mrekulli që duhet të njihet në histori. Ai president, këta diplomatë që nuk reshtin të na ndihmojnë i quan palaço, klloun, rrugaçë dhe i kërcënon me video intime. Pa ndihmën e SHBA nuk e shmangnim dot gjakderdhjen, por ju sot e keni harruar këtë, jeni bërë synet nga gjuha, ua kanë mbyllur gojën, po zhgënjeni shqiptarët, me vjen keq, partia juaj po ju gjuan me gurë kudo që shkoni. Ulsi, na thoni, a është Ilir Meta në shkelje të Kushtetutës për zhdekretimin e 30 qershorit”, -tha Valteri.
Kujtojmë që qeveria para disa muajsh deklaronte se nuk do të tërhiqej nga shkarkimi i Metës, pasi sipas tyre, mazhornaca nuk mund të tolerojë dikë që shkel kushtetutën. Por, me kalimin e kohës ndryshoi dhe qëndrimi i qeverisë, duke thënë se është Gjykata Kushtetuese ajo që vendos për shkarkimin e Metës. Tashmë mazhoranca deklaron se Meta ka kryer shkelje, por nuk janë të rënda sa të justifikojnë shkarkimin e tij./ Opinion.al
