Kreu i Partisë Demokratike, ditën e sotme, e ka quajtur tërheqjen e kandidatit të PS-së në Kavajë si një fitore të çadrës së lirisë. Basha tha se tërheqja e Edi Ramës nga zgjedhjet fasadë të krimit në Kavajë, “rezultat i qëndresës suaj”- iu drejtua qytetarëve.
Ai deklaroi se nuk ka ndërmend të zgjatet në këtë të vërtetë, por shtoi se tërheqja e zgjedhjeve nga Rama në Kavajë, është vetëm rezultat i betejës dhe qendresës popullore për të mos lejuar monizëm të diktuar nga droga dhe krimi.
“ Asgjë tjetër nuk do ndodhte përveç një gare fasadë. Pas presionit publik ata kandiduan përkëmbësin e Elvis Roshit. Bandat e krimit kishin bërë gjithçka gati për një masakër në Kavajë”- tha Basha.
“Asgjë në historinë e shoqërive, kombeve nuk ka rënë nga qielli, asnjë e drejtë, asnjë liri, asnjë territor. Tërheqja e Ramës nga zgjedhjet fasadë të diktuara nga krimi në Kavajë janë vetëm dhe vetëm rezultat i betejës suaj, vendosmërisë suaj për të mos lejuar monizëm të diktuar nga krimi dhe droga”.
Sipas Bashës, shqitarët e bashkuar do t’i tregojnë Ramës se janë më të vendosur se kurrë për zgjedhje të lira e të ndershme dhe i ka ftuar ata në hapin e radhë, në protestën masive që do të mbahet në këtë shesh javën e ardhshme.
“Mos kini asnjë iluzion se ky proces i rikthimit të zgjedhjeve të lira e të ndershme do të ketë sukses pa pasur edhe njëherë bashkimin e shqiptarëve, pa i demonstruar mes pjesëmarrjes masive të shqiptarëve javën e ardhshme, Ramës, në këtë shesh, se shumica e shqiptarëve nuk pranon zgjedhje të diktuara nga krimi e nga droga”.
Kreu i demokratëve theksoi se të vetmet zgjedhje që vendi do mbajë do jenë zgjedhjet e lira dhe të ndershme; të lira nga krimi, droga, monizmi me një qeveri teknike e cila do të përmbushë mandatin popullor për zgjedhjet e lira e të ndershme.
