Dy persona janë arrestuar nga policia në Vlorë si rezultat i operacionit policor të koduar “Knockout”, për goditjen e veprimtarisë kriminale në fushën e prodhimit, shitjes dhe trafikimit të minave me telekomandë.
Sipas policisë kanë rënë në pranga B.U., 31 vjeç dhe A.Q., 21 vjeç, të dy lindur në Pukë dhe banues në Tiranë.
Pas lokalizimit së këtyre shtetasve, në një lokal, në lagjen “28 Nëntori”, oficerët e Policisë, gjatë kontrollit fizik gjetën 3 mina me telekomandë, të montuara me lëndë eksplozive plastike C4, të lidhura me aparat celular, për t’u komanduar në distancë.
Nga veprimet hetimore dyshohet se këta shtetas, në bashkëpunim me njëri-tjetrin, do t’i shisin minat, për llogari të një grupi kriminal, kundrejt çmimit 10 000 euro.
Në bashkëpunim me Prokurorinë, po vijojnë hetimet për dokumentimin e plotë të kësaj veprimtarie kriminale dhe për vënien para përgjegjësisë ligjore të personave të tjerë të përfshirë.
Materialet i kaluan Prokurorisë pranë Gjykatës së Rrethit Gjyqësor Vlorë, për veprime të mëtejshme.
