23 persona janë proceduar ndër ta 7 kanë rënë në prangat e policisë pas protestës së 13 Qershorit në qytetin e Librazhdit. Ndërkohë 16 personat e tjerë janë duke u proceduar në gjendje të lirë.
Bëhet e ditur se mes tyre ndodhen edhe funksionarë të Partisë Demokratike të cilët janë Bujar Vreto krytar i PD-së në Librazhd, ish-deputeti Aurel Bylykbashi dhe sekretarin e Degës së PD-së në Librazhd Erlind Gurra 32 vjeç.
Sipas policisë arrestimi dhe proçedimi i këtyre personave u bë pasi ata janë grumbulluar dhe kanë tentuar të bllokojnë rrugën nacionale në hyrje të qytetit të Librazhdit tek kryqëzimi i Përrenjasit.
Protestuesit kanë tentuar të bllokojnë rrugën nacionale Elbasan – Librazhd, duke penguar eskortën e Kryeministrit, i cili po shkonte në fushatën elektorale të PS në këtë qytet.
Sipas policisë ata kanë goditur eskortën e Ramës me sende të forta e lëndë plasëse piroteknike.
Njoftimi i Policisë:
Librazhd
23 të proceduar ndër ta 7 të arrestuar për protestën e paligjshme të organizuar mbaditen e datës 13 qershorit në hyrje të qytetit të Librazhdit
Policia e Librazhdit bazuar në pamjet filmike, dhe raportet e shërbimit, ka bërë arrestimin në flagrancë të 7 personave për veprat penale të “Organizimit, pjesëmarrjes në grumbullime, manifestime të paligjshme”, dhe “Pengimi i qarkullimit të mjeteve të transportit’’ “Pengim i subjekteve zgjedhore”, konkretisht:- B.V., 48 vjeç, (Kryetari i Degës së PD-së Librazhd); – A.B., 53 vjeç, nga, Elbasani (ish deputet i PD); – A.K., 43 vjeç, nga Prrenjasi; – E.G., 32 vjeç, nga Librazhdi (sekretari i PD-së, dega Librazhd); – D.B., 47 vjeç, nga Shtërmeni, Cërrik; – L.O., 31 vjeç, nga Piskashi; – B.K., 54 vjeç, nga Librazhdi.
Po kështu ka filluar proçedimi penal në gjëndje të lirë, për të njëjtat vepra penale edhe për 16 shtetas të tjerë.
Arrestimi dhe proçedimi i këtyre personave u bë pasi në datën 13.06.2019, rreth orës 18:00 këta shtetas janë grumbulluar në rrugën nacionale në hyrje të qytetit të Librazhdit tek kryqëzimi i Përrenjasit dhe në vijim kanë tentuar që të bllokojnë rrugën nacionale Elbasan – Librazhd, në hyrje të qytetit të Librazhdit, duke penguar eskortën e Kryeministrit dhe kanë goditur eskortën me sende të forta e lëndë plasëse piroteknike.
Materialet proçedurale u referuan në Prokurorinë pranë Gjykatës së Shkallës së Parë Elbasan.
