Tentativa e parë e Shqipërisë për integrimin në BE, dështon në Luksenburg, vendet e mëdha janë skeptike

Dështon tentativa e parë në BE për hapjen e negociatave për Shqipërinë dhe Maqedoninë. Ministrat evropianë të Bashkimit Evropian nuk u pajtuan për nisjen e negociatave të pranimit me Maqedoninë dhe Shqipërinë të martën në Luksemburg.

Një shumicë prej 25 vendeve të BE kishte qenë në favor të mbajtjes së bisedimeve të tilla deri në qershor 2019, tha pas diskutimeve Ministri i Jashtëm grek Nikos Kotzias. Megjithatë, Franca, Holanda dhe Danimarka e kishin bllokuar këtë, shkruan media austriake “Salsburger Nachrichten”.

“Janë dy grupe vendesh, një që është më i madhi, 25 vende, mbështet të hapë negociatat në samitin e 2019 dhe 3 vende, Danimarka Holanda dhe Franca që thonë se duhet të shohin procesin, procesin evropian, stabilitetin dhe sigurinë e gjithë rajonit në Evropën Juglindore. Dhe kjo është shumë e rëndësishme për të gjithë BE. E di që disa vende frikësohen nga populizmi , po nuk mund të luftojmë populizmin me hapa pas. Disa vende kërkojnë integrim të thelluar dhe pastaj zgjerimin, dhe kanë të drejtë, po u tregova një histori që e di mirë se çfarë ndodhi në vitet ‘90. Eksperienca jonë është se mund të bëjmë në të njëjtën kohë të dy proceset dhe është më e mirë për Evropën”, tha Kotzias para gazetarëve.