Nga Blendi Fevziu –
Reforma në Drejtësi ka hyrë sot më së fundi në rrugën e mbarë. Pas deklaratave të përgjithshme, pas angazhimeve dhe pretendimeve të të gjitha palëve, arsyeja ka dominuar mbi llogaritë politike. Palët kanë rënë dakort që drafti i parë të tërhiqet dhe mbi rekomandimet e Komisionit të Venecias të hartohet një draft i ri. Për këtë janë thirrur sërish ekspertët, duke përfshirë edhe ata të opozitës.
Në fakt më herët në mëngjes Presidenti Nishani thirri në një takim kreun e PS Edi Rama. Burime të opinion.al thanë se Nishani kishte pritur më parë edhe Bashën e Metën duke synuar thirrjen e një tavoline të përbashkët ku nën patronazhin e Presidentit të diskutohej për reformën në drejtësi. PD dhe LSI jo zyrtarisht kanë konfirmuar se ata janë përgjigjur pozitivisht, por tryeza dështoi. Edhe pse PS as e pohon dhe as e përgënjeshtron, duket qartë se ka qenë Edi Rama ai që ka refuzuar tryezën e presidentit. Ka qenë po Rama që nën trysninë e Metës, ose për të shmangur protagonizmin e Nishanit ka tërhequr pak orë më pas draftin e imponuar për të cilin opozita kishte vërejtje. Në thelb qëllimi duket i arritur. Me Presidentin apo pa patronazhin e tij, drafti i parë u tërhoq dhe palët kanë rënë dakort të hartojnë së bashku një draft të ri. Diferenca qëndron vetëm në mënyrën se si do arrihet kjo.
Në thelb reforma në Drejtësi është një reformë politike. Vullneti për ta bërë atë vjen nga politika dhe synon përmirësimet që kjo e fundit do të bëjë në sistemin e drejtësisë. Drafti padyshim që do të përgatitet nga ekspertët. Por është politika ajo që e ka kërkuar dhe e di se ku qëndron problemi apo përmirësimet. Në këtë kontekst, një tryezë e Presidentit me aktorët kryesorë parlamentarë do kishte më shumë sens. Tryeza mund të përcaktonte disa piketa të vullnetit politik që më pas, ekspertët do ti kthenin në një paketë ligjore që synon të transformojë drejtësinë. Përsëris edhe një herë. Reforma në drejtësi është një reformë politike dhe Partitë kanë përgjegjësinë morale të shprehen dhe ta marrin përsipër atë. Kjo mund të kishte qenë rruga më e mirë. Sepse veç të tjerave përfshinte në këtë reformë direkt edhe Presidentin e Republikës.
Rruga e dytë është ajo e ekspertëve, të cilët punojnë pa mbikqyrje politike, përgatisin draftin dhe në fund, politika e aprovon atë. Rruga që me gjasë ka preferuar Rama për të shmangur përgjegjësinë e politikës dhe për t’i lënë, së paku “de Jure” përgjegjësinë tek ekspertët dhe Komisioni i Venecias. Në fakt edhe kjo nuk është ndonjë pavarësi e madhe sepse në fund ajo që do ta aprovojë do jetë sërish politika.
Rruga e zgjedhur ka qenë kjo e dyta dhe tani pritet vetëm të shohim se ku do shkohet me të. Nuk dihet sa do zgjasë, por një gjë ka rëndësi, tani produkti ose do të jetë konsensual, ose s’do të kemi më një produkt.
Blendi Fevziu
