Gjatë ditës së sotme janë mbledhur protestues pranë objekteve komunale në Zveçan, Leposaviq dhe Zubin Potok në Kosovë në mënyrë që t’i pengojnë kryetarët e rinj të hyjnë në ndërtesat e komunave.
Policia e Kosovës përdori gaz lotsjellës për t’i shpërndarë qytetarët e tubuar para objektit komunal në Zveçan.
Mësohet se protesta ka nisur si paqësore e më vonë është tensionuar, nga ku janë dëgjuar të shtëna armësh kryesisht në Zveçan si dhe është djegur një makinë e policisë.
Paraprakisht, policia njoftoi se po asistonte kryetarët e rinj të komunave veriore: Zveçan, Leposaviq dhe Zubin Potok, për të hyrë në objektet zyrtare të komunave përkatëse.
Udhëheqësit e këtyre komunave u betuan një ditë më herët në ndërtesa publike, për shkaqe të sigurisë.
Në të katër komunat me shumicë serbe në veri u dëgjuan fillimisht sirena alarmi, ndërkohë që para objekteve komunale në Zubin Potok, Zveçan dhe Leposaviq u mblodhën edhe qytetarë.
Kryetarët e rinj të komunave të Zveçanit, Leposaviqit dhe Zubin Potokut, që të gjithë shqiptarë, bënë betimin më 25 maj, duke marrë kështu pushtetin lokal në këto tri komuna me shumicë serbe në veri të Kosovës./Opinion.al
