Shtetet e Bashkuara të Amerikës thanë të mërkurën se rruga diplomatike është e duhura për të parandaluar fillimin e një konflikti të armatosur të Rusisë në Ukrainë.
Sipas agjencisë së lajmeve Reuters, Moska zhvilloi bisedime për sigurinë me vendet perëndimore dhe intensifikoi ngritjen e saj ushtarake pranë Ukrainës me stërvitje të reja.
Në një përgjigje me shkrim ndaj kërkesave të Rusisë, SHBA përsëriti angazhimin e saj për të mbështetur politikën e “dyerve të hapura” të NATO-s duke ofruar një “vlerësim parimor dhe pragmatik” të shqetësimeve të Kremlinit, tha Sekretari i Shtetit Antony Blinken.
Blinken foli me ministrin e Jashtëm kinez Wang Yi për Ukrainën të mërkurën, duke nënvizuar sigurinë globale dhe rreziqet ekonomike që mund të rrjedhin nga agresioni i mëtejshëm rus, tha Departamenti i Shtetit.
“Sekretari Blinken tha se diplomacia është rruga e duhur për të ecur përpara,” tha zëdhënësi i departamentit Ned Price në një deklaratë.
Rusia i ka kërkuar NATO-s të tërheqë trupat dhe armët nga Evropa Lindore dhe të ndalojë fqinjin e saj Ukrainën, një ish-shtet sovjetik, që të mos anëtarësohet në NATO. Uashingtoni dhe aleatët e tij në NATO e kundërshtojnë këtë pozicion, por thonë se janë të gatshëm të diskutojnë tema të tjera si kontrolli i armëve , që lidhet me pozicionimin e raketave në Evropë./Opinion.al
