Kreu i Grupit Parlamentar të PD-së, Gazment Bardhi, ka dalë sot në një konferencë për media për të folur mbi protestën para Kuvendit.
Gjatë fjalës së tij, ai ka deklaruar se kushdo që ka lejuar futjen e forcave speciale të policisë në ambientet e Kuvendit, do të mbajë përgjegjësi penale.
Ai theksoi se kurrë në 34 vite nuk ka ndodhur që të sulmohen deputetët nga FNSH në mjediset e Kuvendit.
“Nuk u përgjigjem ushtarëve të bandave, përzgjedh të merrem me bandat. Ushtarët e tyre si ministri i Brendshëm Ervin Hoxha, drejtori i Përgjithshëm i Policisë së Shtetit Ilir Proda dhe drejtori i Policisë së Tiranës, Tonin Vocaj, nuk janë në fokusin e punës time.
Sot denoncoj se janë vjedhur 180 mln euro. Nuk akuzohen deputetët e opozitës. Prokuroria e Posaçme është ngritur për këtë për të luftuar korrupsionin dhe vjedhjet e shtetit, jo për të sulmuar deputetë e opozitën.
Diçka e pa ndodhur kurrë në 34 vite që të sulmohen deputetët nga FNSH në mjediset e Kuvendit. Ju siguroj se do të sjell përgjegjësi penale dhe ligjore për cilindo që ka lejuar futjen e forcave speciale të policisë në ambientet e kuvendit”, tha Bardhi.
