I dërguari i posaçëm amerikan për Ballkanin Perëndimor, Gabriel Escobar, thotë se Kosova ka garanci shumë të forta të sigurisë nga Shtetet e Bashkuara.
Në një intervistë për Radio Evropa e Lirë kur u pyet se si e sheh SHBA deklaratën e presidentit serb, Aleksandër Vuçiç që Serbia më 15 dhjetor do të kërkojë nga KFOR-i kthimin e forcave të saj në Kosovë, Escobar nënvizoi se Shtetet e Bashkuara e kundërshtojmë këtë në mënyrë kategorike.
“Ne e kundërshtojmë këtë në mënyrë kategorike. Ne e refuzojmë këtë në mënyrë kategorike. Nuk e mbështesim fare. Dhe, po ashtu, dua të them se Kosova ka garanci shumë të forta të sigurisë nga Shtetet e Bashkuara të Amerikës”, u shpreh Gabriel Escobar.
Teksa u pyet se cila do të ishte përgjigjja e SHBA-së nëse Beogradi do të bënte një inkursion të armatosur në veri të Kosovës, Escobar u përgjigj: Para së gjithash, nuk e pres këtë. Por, së dyti, do të ritheksoj se Kosova ka garanci të forta sigurie nga Shtetet e Bashkuara, të manifestuara me pjesëmarrjen e tyre në KFOR.
