Pas njoftimit të qeverisë së Kosovës për shtyrjen deri më 1 gusht të zbatimit të reciprocitetit, serbët e veriut nisën heqjen e barrikadave në veri.
Ndërkaq, shefi i diplomacisë së Bashkimit Evropian, Josep Borrell, ka ftuar në një takim në Bruksel kryeministrin e Kosovës, Albin Kurti, dhe presidentin e Serbisë, Aleksandar Vuçiç.
Sipas Radio Evropa e Lirë, Kurti dhe Vuçiç kanë marrë ftesë për vazhdimin e dialogut, në të cilin do të diskutohet për të gjitha çështjet e hapura mes dy shteteve.
Ndërkohë, zëdhënësi i BE-së, Peter Stano, tha se institucionet e BE-së, dhe shtetet anëtare po vëzhgojnë “me shqetësim” ngjarjet në Kosovë, ndërsa shtoi se çdo veprim i pakoordinuar dhe i njëanshëm që kërcënon stabilitetin dhe rrezikon lirinë e lëvizjes duhet të ndërpritet.
Burimet në Bruksel tërheqin vërejtjen se tensionet janë pasoja e drejtëpërdrejtë e mungesës së vullentit të liderëve për t’u ulur dhe për të vazhduar dialogun, zyrtarët atje theksuan se para fillimit të pushimeve verore në BE ishte planifikuar që të mbahej një takim mes liderëve të Kosovës dhe Serbisë.
“Për shkak të atij fakti të mosmbajtjes së takimit, tani kemi tensione që kanë potencial të përshkallëzohen sepse kemi sërish një temë të nxehtë. Çdo politikan i përgjegjshëm do t’i hipte avionit dhe do të vinte në Bruksel sa më shpejt që të mundej me qëllim që të gjendej një zgjidhje në Bruksel”, tha një zyrtar evropian për REL-in në kushte anonimiteti.
Sipas burimeve të REL-it, ftesa e Borrellit për takimin në Bruksel është e hapur dhe për momentin nuk ka ndonjë datë për rundin e ri të dialogut pasi sipas tyre gjithçka varet nga vullneti politik i liderëve të Kosovës dhe Serbisë.
Deri më tani nuk ka konfirmim për pjesëmarrjen e udhëheqësve të Kosovës dhe Serbisë në këtë takim të thirrur nga Borrell.
Ndërkohë në marrëveshjen e reciprocitetit thuhet se, të gjithë qytetarët e Serbisë që do të hyjnë në Kosovë do të pajisen me një dokument për hyrje-dalje me të hyrë në territorin e shtetit. Ky dokument do të vlejë për 90 ditë. Dhe vendimi i dytë për targat thotë se të gjithë personat që kanë makina me targa me akronim të qyteteve të Kosovës, që lëshohen nga Serbia, duhet t’i riregjistrojnë makinat e tyre.
