Pas tensioneve gjatë ditës së sotme deputeti i Partisë Socialiste, Erion Braçe ka njoftuar se ka përfudnuar mbledhja online e komisionit të Ekonomisë.
Braçe thotë se ish-kryeministri Sali Berisha nuk mund të bllokojë komisionin dhe përfitimet për bujqit dhe fermerët pas miratimit të paketës fiskale për këta të fundit.
“Sapo mbaruam mbledhjen e komisionit të Ekonomisë dhe Financave ishte prezantimi i projektbuxhetit edhe paketës fiskale. Jam shumë i kënaqur t’i njoftoj të gjithë blegtorët se propozimi juaj për përjashtimin nga TVSH të mëshqerrave të rracës mbarëse realizohet këtë vit me paketën fiskale. TVSH për të do jetë zero. Një propozim i dytë për të çliruar bletët për pjalmim në sera. Fermerëve që merren me sera, u them larg hormoneve, bleta e bën shumë mirë këtë punë. Këto janë gjëra në paketën fiskale të dedikuara bujqësisë, vijojmë për më shumë se kaq”, u shpreh Braçe.
Gjatë ditës së sotme deputetët e PD kanë bllokuar punimet e Konferencës së Kryetarëve e cila ishte parashikuar për në orën 10:00, pas tensioneve mbledhja u zhvillua në orën 13:00. Edhe në komisionin e ekonomisë që ishte parashikuar për në orën 15:00 demokratët bllokuan zyrat, duke i detyruar socialistët të largoheshin nga kryesia. Më vonë u njoftua që mbledhja e komisionit do të zhvillohej në orën 16:00 online.
