Një 19-vjeçar u dënua ditën e hënë nga drejtësia franceze me dy vjet burg, për shkak të disa thirrjeve që ai bëri për vrasjen e një oficeri policie.
Sipas mediave të huaja, 19-vjeçari i identifikuar si Corentin S. u dënua me dy vjet burg, një prej të cilëve u pezullua, pasi publikoi mesazhe në Twitter në të cilat bënte thirrje për vrasjen e një oficeri policie të identifikuar gabimisht si autori i të shtënave ndaj të riut Nahel, vdekja e të cilit shkaktoi trazira në të gjithë Francën.
Më 28 dhe 29 qershor, Corentin S. postoi në Twitter foton e policit, të shoqëruar me një tekst që premtonte shpërblime të ndryshme: 550 euro për dorën e prerë, 1200 euro për të dyja duart, 2000 euro për vdekjen e policit. I riu, i arrestuar të enjten e kaluar, publikoi gjithashtu mesazhe duke bërë thirrje për një sulm në një qendër tregtare në qytetin Créteil, në periferi të Parisit. Qendra tregtare ishte shënjestër e protestuesve gjatë ditës së 30 qershorit, duke detyruar autoritetet ta evakuonin atë.
Gjatë seancës në Gjykatën Penale të Créteil, 19-vjeçari shprehu keqardhjen dhe tha se donte të kompensonte gabimet e tij.
“Unë i njoh gabimet e mia, është e vërtetë që shkova shumë larg”, tha ai në gjykatë, duke treguar se kishte kërkuar të fitonte para përmes postimeve të tij./Opinion.al
