Teksa po shqyrtoheshin listat shumemërore të kandidatëve për deputetë për zgjedhjet parlamentare të 18 qershorit për 9 subjekte politike, tre anëtarët e opozitës braktisën mbledhjen e KQZ-së.
Largimi nga mbledhja erdhi pas rrëzimit me votë nga katër anëtarët e mazhorancës të propozimit të nënkryetarit të KQZ-së, Hysen Osmanaj, për shtyrjen me 24 orë të shqyrtimit të listave të 5 partive.
“Unë them që 5 parti: Aleanca Demokratike, Aleanca Demokristiane, Aleanca Arbnore Kombëtare, Fryma e Re Demokratike dhe Partia Komuniste e Shqipërisë, të merren në shqyrtim nesër, ka afat dhe të shtyhet 24 orë. Materialet na kanë ardhur në orën 16:00 dje ose më vonë, më rezultojnë se kanë parregullsi të mëdha. Propozoj që 5 parti të mos i kalojmë sot. Të kalojmë partitë që nuk kanë lista mbështetëse, Partinë Socialiste, Partinë Kristian Demokrate, Aleancën Popullore për Drejtësi dhe Partinë Socialdemokrate. Kemi 48 orë afat, pra kemi afat edhe nesër për t’i verifikuar”, propozoi Osmanaj.
Por ky propozim i tij u rrëzua nga anëtarët e mazhorancës në komision, dhe pas kësaj 3 anëtarët e tjerë u larguan nga mbledhja.
