OSHEE është përfshirë në një megaskandal, duke dhënë me miliona lekë për identifikimin e abonentëve edhe pse ka vetë në dispozicion një armatë me punëtorë. Duke reaguar për një shkrim të BoldNeës që u publikua në të gjitha portalet, OSHEE ka shpjeguar procedurat e tenderit.
Sipas saj, projekti është financuar nga Banka Botërore dhe ka për qëllim identifikimin e plotë të aabonentëve, adresa e saktë, mënyra se si janë lidhur klientët në rrjet nisur nga niveli i tensionit si dhe të dhënat për matësit.
OSHEE thotë se bëri me stafin e saj 96 000 kontrata, por smund të mbyllte procesin Brenda afateve pasi janë 1.2 milionë kontrata. Në këtë situatë, OSHEE ka parë të nevojshme angazhimin e kompanive të specializuara për të kryer këtë project.
Po kështu edhe Ministria e Brendshme kishte një projekt të ngjashëm për sistemin e adresave ndaj Qeveria gjykoi që këto dy projekte të shkrihen në një. “ Më 16.3.2016 me vendim qeverie OSHEE u caktua si organ qendror blerës, për kryerjen e procedurës së prokurimit publik për llogari të vet dhe të Ministrisë së Punëve të Brendshme”, thuhet në njoftimin zyrtar të OSHEE-së.
Sqarimi i OSHEE për tenderin
Për studimin e tregut në nxjerrjen e fondit limit janë marrë parasysh pesë oferta. Në përfundim të procesit, në datën 23.05.2016 është bërë publikimi i dokumenteve në Agjencinë e Prokurimit Publik me fondin limit 856,000,000 Lek (Pa TVSH). Në zbatim të ligjit, njoftimi për këtë procedurë tenderi është publikuar edhe në shtypin ndërkombëtar, konkretisht në gazetën prestigjioze “Financial Times”.
Ministria e Brendshme ka planifikuar fondin e saj për këtë procedurë të përbashkët në vlerën 400,000,000 lekë (me TVSH) ndërsa pjesa tjetër e shumës totale është mbuluar nga fondi i OSHEE-së.
Në përfundim të procedurës, kanë marrë pjesë dy ofertues. Ofertuesi i parë është Bashkimi i Operatorëve “CSI Piemonte-Consorzio per il sistema informative”, Datech sh.p.k dhe Çelësi sh.p.k. me vlerën 849,580,000 lekë pa TVSH. Ofertuesi i dytë ishte shoqëria “Fastech” sh.p.k e cila nuk ka paraqitur një ofertë ekonomike. Në zbatim të parashikimeve ligjore, fitues është shpallur ofertuesi Bashkimi i Operatorëve “CSI Piemonte-Consorzio për il sistema informative”, Datech sh.p.k dhe Çelësi sh.p.k.
Të gjitha procedurat janë ndjekur në zbatim të ligjit për Prokurimin Publik dhe nuk ka patur ankesa nga asnjë subjekt gjatë gjithë fazave nga shpallja e specifikimeve teknike deri në shpalljen e fituesit. Afati i realizimit të kontratës është 6 muaj nga data e lidhjes së saj mes autoritetit kontraktor dhe fituesit.
Referuar bashkimit të shoqërive fituese të tenderit, OSHEE sqaron se sipas marrëveshjes për bashkim të përkohshëm të shoqërive, ndarja e përgjegjësive midis palëve është: CSI Piemonte 80 përqind e zbatimit të kontratës; Datech 10 përqind dhe Çelësi 10 përqind. CSI Piemonte është konsorcium i njohur italian i themeluar në vitin 1977 dhe në historikun e saj ka një përvojë të zgjeruar e të suksesshme në aktivitet të njëjtë me atë për të cilin është shpallur fitues në këtë tender në Shqipëri.
