Pas Kontrollit të Lartë të Shtetit, Ministria e Infrastrukturës dhe Energjisë deklaron se ka nisur verifikimet për dokumentet e kompanisë së nipit të deputetit socialist Sadri Abazi. Në media u publikuan shkrime ku kompania e Arbër Abazit “Alko-Impex General Construction” kishte faksifikuar diplomat e inxhiniereve. Pra dyshimet jane se ka marre tendera me dokumente falas.
Deklarata e Ministrisë së Infrastrukturës:
“Në vijim të interesimit tuaj pranë Ministrisë së Infrastrukturës dhe Energjisë, referuar disa artikujve të publikuar në media për shoqërinë Alko-Impex General Construction, sqarojmë sa vijon:
Rezulton se dy shoqëri kanë paraqitur pranë Ministrisë së Infrastrukturës dhe Energjisë kërkesë për heqjen e licencës së shoqërisë “ALKO-IMPEX General Construction” shpk (kërkesa të protokolluara në MIE me nr.207 prot., datë 30.03.2018, nr. 220 prot, datë 03.04.2018, nr.207/1 prot., datë 12.04.2018). Kërkuesit pretendojnë se shoqëria “ALKO-IMPEX General Construction” ka përfituar licencë në fushën e zbatimit në ndërtim, duke paraqitur dokument të rremë për inxhinierin Bekim Mehmet Selmani.
Në referencë të ankesave të paraqitura nga dy shoqëritë e mësipërme, Ministria e Infrastrukturës dhe Energjisë, në zbatim të dispozitave të rregullores së licencimit të shoqërive që kryejnë punime në fushën e ndërtimit, po kryen procedurën e kërkimit të konfirmimit për vërtetësinë e dokumentacionit për këtë drejtues teknik. Rezultati do ti bëhet i ditur më pas Komisionit të Posaçëm të dhënies së Licencave në fushën e Zbatimit të Punimeve të Ndërtimit dhe do të veprohet më tej në përputhje me përcaktimet ligjore në rast të konstatimit të një shkeljeje të mundshme.
Referuar pyetjes suaj lidhur me procedurat e prokurimit që mund të kryhen nga ana e Ministrisë së Infrastrukturës dhe Energjisë, ju sqarojmë se bazuar në Legjislacionin e Prokurimeve Publike dhe atë të Koncesioneve si dhe të PPP-ve, MIE në cilësinë e Autoritetit Kontraktor i zhvillon procedurat e tenderave në fushën e përgjegjësisë së vet, të hapura, dhe në platformën elektronike të Agjencisë së Prokurimit Publik, në të cilat ftohen të marrin pjesë të gjithë operatorët ekonomik të cilët nuk janë përjashtuar nga kjo e fundit për arsye të parashikuara në legjislacionin e Prokurimit Publik.”
Lexo edhe:
KLSH nis verifikimet për kompaninë e nipit të Sadri Abazit
Thellohet skandali i tenderave të nipit të Sadri Abazit/ Inxhinieri: Më është keqpërdorur diploma
Dokumenti/ Kompania e nipit të Sadri Abazit fitoi 13 miliardë tendera për 1 vit
