Reforma Zgjedhore është në fokusin e politikës shqiptare ditët e fundit. Lidhur më këtë çështje, ka folur Përfaqësues i Lëvizjes Socialiste për Integrim në tryezën për reformën zgjedhore, Petrit Vasili.
Gjatë një interviste për A2, Vasili është shprehur se nuk ka pasur asnjë vendim për të braktisur tryezën për reformën zgjedhore pas shembjes së Teatrit Kombëtar dhe protestave që e shoqëruan atë.
Sipas Vasilit, temat e nxehta të reformës do të jenë prova e vërtetë e tryezës.
“Nuk ka pasur asnjë vendim për të mos marrë pjesë në tryezën e reformës zgjedhore pas prishjes së godinës së Teatrit Kombëtar. Do të ishte një idiotësi nëse do të mendohej që të zhvillohej një mbledhje në atë ditë. Besoj se kryetemat e çështjes, temat e nxehta, ato të cilat na kanë bërë të shkojmë në këtë reformë zgjedhore, që kanë të bëjnë me kriminalizimin dhe shitblerjen e votës, janë përpara dhe ato janë prova e së vërtetës. Në rast se mungon vullneti është e paralajmëruar një përballje shumë e rreptë sepse nuk ka rrugë tjetër. Nuk mund të pranohet që kryefjala e zgjedhje të ardhshme të jenë kriminelët”, u shpreh Vasili./ Opinion.al
