Kompania celulare “Telekom Albania” është në shitje dhe ofertuesi kryesor për ta blerë është “Telekom Serbia”. Lajmi që raportuam pak ditë më parë me burime, sot është zyrtar. Kjo, pasi në Tiranë ka mbërritur një përfaqësi e kompanisë serbe që ka zhvilluar një takim në Ministrinë e Infrastrukturës.
Mësohet se në këtë takim, pala shqiptare i ka thënë përfaqësuesve të “Telekom Serbia” se “futja e tyre në tregun shqiptar në një sektor strategjik si telekomunikacioni, nuk është e mirëseardhur”.
Sipas këtyre burimeve drejtuesit e ministrisë së infrastrukturës i kanë komunikuar “Telekomit Serb” se hyrja e tyre në Shqipëri do të ishte krejt e papërshtatshme edhe për biznesin e tyre, pasi mund te sjellë reagime të padëshirueshme të natyrës politike.
Ndërkohë sipas mediave serbe “Telekom Serbia” ka bërë ofertën më të lartë për blerjen e “Telekom Albanias”, duke ofruar 60 milionë euro. Kjo shifër e bën “Telekomin Serb” favoritin kryesor për të vlerë “Telekom Albania”.
Qeveria shqiptare nuk preferon që ky transaksion të ndodhë, por nuk ka asnjë instrument ligjor për ta ndaluar pasi “Telekom Albania” është kompani private.
Tashmë mbetet për tu parë nëse serbët do të insistojnë për të investuar në Shqipëri, në tregun e telekomunikacioneve, edhe pse zyrtarisht nuk kanë marrë një “PO” nga qeveria.
