Qëndresa kundër vendimit për prishjen e Teatrit Kombëtar vazhdon por kryetari i Bashkisë së Tiranës, Erion Veliaj ka deklaruar sot në mbledhjen e Këshillit Bashkiak se godina do të shembet dhe nuk ka kthim pas.
“Të mos ketë asnjë njeri iluzione, teatri i ri do të bëhet. Ne do të japim parkingun e Bashkisë, komplet i pavlerë. Në shkëmbim të një prone që nuk ka pikë vlere do të marrim një teatër që vlen minimalisht 30 milionë euro”, tha Veliaj.
Ai shtoi se po ndiqen të gjitha procedurat sipas rregullave dhe se teatri i ri do të bëhet.
“Atyre që po lodhen aty te teatri ne i themi “ruajini energjitë” sepse ne do t’i bëjmë gjërat sipas procedurave. Donit garë, garë bëmë. Donit komision, komision bëmë. Donit sipas Bashkimit Europian, pavarësisht se na lanë te dera, prapë sipas Bashkimit Europian, por tani që i respektuam të gjitha, teatri do të bëhet”, tha kreu i Bashkisë. /Opinion.al
