“Aleanca për Mbrojtjen e Teatrit” ka nisur protestën para Prokurorisë së Posaçme kundër Korrupsionit dhe Krimit të organizuar (SPAK), duke kërkuar nisjen e hetimeve për shembjen e Teatrit Kombëtar.
Po ashtu, regjisori Robert Budina është shprehur se në momentin që Bashkia e Tiranës nisi shembjen e teatrit, brenda tij kishte ende njerëz. Në këtë mënyrë ai pretendon për një tentativë vrasje nga ana e shtetit, ndërsa shton se për këtë çështje ka dëshmi si dhe pamje filmike.
Budina theksoi se nëse kjo çështje nuk gjen drejtësi në Shqipëri, atëherë kjo do të ndiqet dhe në nivele të tjera, duke nënkuptuar Gjykatat Ndërkombëtare. Regjisori theksoi se do të vazhdojnë protestat deri sa të shohin një lëvizje nga prokuroria.
Qëllimi protestës është sensibilizimi. Kemi caktuar juristët të flasin për çfarë ne jemi këtu ndërsa në parim protesta para SPAK është sensibilizim dhe mbështetje totale nga ana jonë e prokurorëve që të vazhdojnë ato procese që kemi sjellë këtu dhe do të vazhdojmë do të sjellim. Fadroma i ra Teatrit kur ishim brenda, të veprojnë me urgjencë se ishte tentativë për vrasje. Kemi prova dhe filmime. Prokurorët duhet të ndihen të mbështetur se ne do ta çojmë këtë lëvizje në gjithë Shqipërinë. Që mos ta çojnë popullin në përplasje me qeverinë kanë detyrën dhe moralin që të hapin procese dhe të shkojnë tutje. Nuk është faji i artistëve që mbrojtën Teatrin Kombëtar që nuk ka sistem drejtësie. Duke qenë se politika na ka vjedhur institucionet dhe drejtësinë jemi të detyruar të thërrasim popullin në fushëbeteje për të mbrojtur demokracinë. Populli është i lodhur vëllezër prokurorë, bëhuni ju të parët që jepni shkëndijën e shpresës. Nëse ju fshihni kriminelët do të ketë një përgjigje mbarëpopullore. Jemi të vendosur ta çojmë deri në fund betejën tonë pa kompromise. E kemi provuar në kurriz, as duam të bëjmë parti dhe as të përfitojmë”,-tha Budina./ Opinion.al
