Teksti i mëposhtëm është nxjerr nga vepra “Perandoria e frikës: Brenda Shtetit Islamik”, e autorit Andrew Hosken
1. ISIS-i është një organizatë e re terroriste, e cila është rritur me shpejtësi dhe u njoh në vitin 2014.
Nuk është e vërtetë. Grupi terrorist i ka rrënjët në vitin 2001, kur njihej si “Taëid al Jihad”, madje edhe më herë, kur baballarët e xhihadistëve të ISIS-it të sotëm luftonin në Afganistan krah talebanëve. Që në atë kohë, grupi ka ndërruar emrin të paktën pesë herë.
2. Shpallja e kalifatit në korrik në zonën e Lindjes së Mesme ishte e paprecedent.
Nuk është e vërtetë. Grupi fillimit u vetëdeklarua si Shteti Islamik i Irakut, në vitin 2006. Lideri në atë kohë ishte Abu Omar al Baghdadi, i cili e shpalli veten kalif dhe pretendonte se kishte lidhje gjaku me profetin Muhamed.
3. Kalifi i sotëm, Abu Bakr al Baghdadi, u radikalizua pasi u burgos nga SHBA-të në vitin 2003 dhe iu përkushtua terrorit pas lirimit.
Në fakt, ka prova që shtohen gjithnjë e më shumë, sipas të cilave Baghdadi ishte një terrorist në kohën kur u burgos nga amerikanët dhe mund të ketë luftuar në Afganistan. Mendohet se ai ka jetuar në të njëjtën shtëpi me liderin e parë të grupit, Abu Musab al Zarqawi. Ndryshe nga sa raportohet, Baghdadi nuk ka qëndruar në burgun e Bucca-s për pesë vjet. Ai është mbajtur në qeli nga janari deri në dhjetor të vitit 2004, kur u lirua nga amerikanët.
4. Drejtuesit e grupit janë ekstremistë fanatikë të islamit
Një tjetër përshtypje e gabuar. Ndikimi i ish-oficerëve të ushtrisë së Sadam Husseinit është i madh. Të paktën 12 prej liderëve të grupit kanë qenë oficerë të kësaj ushtrie. ISIS-i është një kombinim mes organizatës terroriste dhe ushtarakëve me eksperiencë në terror.
5. Është një organizatë kaotike dhe e dhunshme
Nuk diskutohet që është e dhunshme, por kjo është pjesë e metodave të saj. Grupi i referohet një libri me 280 faqe “Menaxhimi i egërsisë”, një manual që përshkruan me detaje si mund të ngrihet dhe mbahet një shtet islamik duke përdorur dhunën ekstreme.
ISIS-i ka burokracinë e vet, me një këshill menaxhimi që quhet Shura, një kabinet lufte dhe disa komitete. Ka guvernatorë për territoret që ka nën kontroll, madje dhe për ato që do të fusë në dorë, si Arabia Saudite.
Ka ministri si ajo e kamikazëve dhe disa komitete që merren me administrimin e çështjeve si shëndeti, burgjet dhe gjykatat. Në vitet 2012 dhe 2013, ata kanë përpiluar edhe raportet vjetore mbi sulmet me bomba dhe shënjestrat e goditura. P.sh. gjatë vitit 2013, ata thonë se kanë kryer 1 083 vrasje.
6. Është krijuar nga Al Kaeda
Është fakt që ISIS-i ka qenë i ndarë nga Al Kaeda që në ditët e para të krijimit. Lideri i parë, Abu Musab al Zarqawi, dhe Osama bin Laden nuk merreshin vesh mirë me njëri-tjetrin. Për rreth dy vjet, grupi njihej si “Al Kaeda” në Irak (AQI), por kjo periudhë është njohur si “martesë për përfitim”. Gjatë kohës së marrëdhënieve të tendosura, “Al Kaeda” shpesh e ka kritikuar grupin që më vonë do të bëhej ISIS për vrasjen e myslimanëve shiitë dhe prerjen e kokave të perëndimorëve. “Al Kaeda” e ka akuzuar shpesh grupin se “po e dëmton xhihadin”. Në vitin 2006, marrëdhënia mes dy grupeve përfundoi me deklarimin e Shtetit Islamik të Irakut.
7. ISIS-i është një armik i ri për Perëndimin
Krejt e gabuar. Në fakt, Shtetet e Bashkuara të Amerikës kanë qenë në luftë me të që nga viti 2003, pra për 12 vjet. Një kohë kjo trefish më e gjatë se lufta e SHBA-ve kundër Japonisë dhe Gjermanisë naziste. /Shekulli/
