Kryesia e Partisë Socialiste është mbledhur mëngjesin e kësaj të hëne, ndërsa në fokus ka qenë qëndrimi që do të mbajë mazhoranca pas djegies në bllok të mandateve të deputetëve nga opozita.
Numri dy i PS-së, pas mbarimit të mbledhjes tha për mediat se qeveria është e vendosur për të vijuar më tej, pavarësisht kërkesave të opozitës për qeveri kalimtare dhe zgjedhje të parakohshme.
“Të enjten do të jemi në Kuvend për të votuar KLGJ dhe KLP”, theksoi zoti Balla. Nga ana tjetër, Lulzim Basha ka thënë se opozita do të protesojë çdo të enjte, deri në largimin e Edi Ramës.
“Duke nisur nga java e ardhshme, më 28 shkurt, 7 mars do të organizohen protesta kombëtare para Asamblesë kriminale që ka uzurpuar godinën e Kuvendit të Republikës së Shqipërisë, dhe më 16 mars do të zhvillohet një tjetër protestë e madhe kombëtare me qëllim rrëzimin e Edi Ramës”, ka thënë dy ditë më parë kryedemokrati./ G.F Opinion.al
