Kryedemokrati Basha duket se nuk i ka lënë asnjë hapësirë dorëheqjes, lidhur me rezultatin e zgjedhjeve të 25 Prillit. Kjo kërkesë u artikulua edhe në mbledhjen e së dielës nga anëtari i Kryesisë së PD Fatbardh Kadilli, por nga fjalimi i Bashës ai e ka lënë të kuptohet qartë se do të vijojë të jetë në krye të partisë.
Basha tha në hapje të mbledhjes se 25 Prilli qe një masakër elektorale dhe për këtë gishti duhej vendosur jashtë sallës së mbledhjes së PD.
Duke e cilësuar një regjim, qeverisjen e Kryeministrit Rama, kreu demokrat tha se nuk do të ndalej deri në çmontimin e tij, duke lënë të kuptojë se ai do të vazhdojë të jetë në krye të PD-së. “Regjimi Rama-Doshi ka zgjedhur nje sistem qe i përmbys vlerat, që mjetet e të keqes i konsideron më të vlefshem se mjetet e të mirës. Që legjitimon përdorimin e krimit dhe që nuk lë shteg tjetër vecse futjen e vendit në një spirale vicioze, ku bandave i duhet përgjigjur me banda, vjedhjes me vjedhje, antivlerave me antivlera. Por a është ky misioni ynë? A është kjo ajo që në duam për Partinë Demokratike? Ajo që ne duam për të ardhmen e këtij vendi? Përgjigja ime është jo. Jo dhe prapë jo! Kjo nuk mund të jetë alternative jonë për Shqipërinë. Prandaj nuk do ndalemi asnje cast derisa të çmontojmë këtë regjim dhe vlerat që i ndajmë me shumicën dërrmuese të shqiptarëve të triumfojnë”, tha Basha. Gjithashtu duke folur pëër atë që e quajti zemërim të demokratëve, Basha tha se bashkarisht do të luftojnë në betejën për fitoren, duke nënkuptuar vijimësinë e tij në krye të PD.
“Unë jam i bindur në drejtësinë e betejës tonë. E di se si unë ndihet shumica dërrmuese e demokratëve, e ndjej zemërimin e tyre për masakrën zgjedhore të 25 prillit, e di që ata janë gati që këtë zemërim ta kthejnë në energjinë e nevojshme për ta luftuar betejën tonë deri në fitore. Prandaj ju kërkoj të vazhdojmë rrugën që kemi nisur. Të bashkuar në këtë moment përcaktues për të ardhmen e betejës tonë dhe për fatet e vendit dhe të përmirësojmë, bashkarisht, ato gjëra që sigurisht mund dhe duhet të përmirësojmë”, tha Basha.
PD do të shkojë në zgjedhjet për kryetarin më 13 Qershor, ndërkohë që përballë Bashës qëndron deri në këto momente si kandidat vetëm Fatbardh Kadilli. /Opinion.al
