Në mbledhjen e sotme të Komisionit Hetimor për zgjedhjet e 25 Prillit, n/kryetari i Partisë Socialiste, Toni Gogu ka kërkuar që të përjashtohen nga thirrja si dëshmitar kreu i SPAK-ut, Arben Kraja dhe drejtuesi i Prokurorisë së Përgjithshme, Olsian Çela.
Ndërsa ka kërkuar që të ftohen si dëshmitarë tre deputetë demokratë, Gazment Bardhi, Xhelal Mziu dhe Albana Vokshi.
“Pjesa e parë e planit të hetimit është e mbushur me paragjykime për çështjen, ngjarje apo fakte të pretenduara. E bëni fakt të kryer masakrën, ne atë po hetojmë. Janë të gjitha pretendime, të riformulohet plani i hetimit. Nuk mund të nxjerrim veprimtarinë e komisionit jashtë shinave.
Në listën e dëshmitarëve do të donim të përjashtoheshin; drejtuesi i SPAK-ut dhe prokurori i përgjithshëm, Kraja dhe Çela për shkak se rrethanat që janë në dijeni të çështjes na rezulton se nuk janë në përputhej me cilësinë e dëshmitarit, por informacioni që kanë është i domosdoshëm dhe besoj se ka mbërritur.
Do të donim të shtonim në listë Gazment Bardhin, që u vetë-ofrua në seancën e fundit si dëshmitar, Xhelal Mziun, që ka një deklaratë që ka treguar se ka dijeni për atë periudhë që jemi duke hetuar për “SMV”-të dhe Albana Vokshin dhe kjo ka të njëjtën deklaratë. Këto janë kërkesat tona sot”-tha ai.
Kreu i komisionit Enkelejd Alibeaj hodhi poshtë kërkesën për përjashtimin si dëshmitarë të Arben Krajës dhe Olsian Çelës.
“Askush nuk ka të drejtë të përjashtohen dëshmitarët, është një kërkesë që nuk mund ta ezaurojmë dot. Nuk do të pyeten për çështje konkrete, por do të japin sqarime lidhur me ato të dhëna që Kodi Zgjedhor parashikon; statistika, sa çështje janë regjistruar, cilën fazë hetimi janë, pa përmendur personat në hetim dhe të akuzuar sepse kjo është sekret hetimor”-tha ai.
