Detaje të reja janë zbardhur nga ngjarja e mbrëmshme (16 Prill) në kryeqytet, ku u regjistruan të shtëna me armë zjarri pranë Liqenit Artificial.
Sipas Klan News, mësohet se e gjithë ngjarja ka nisur brenda një lokali, për një konflikt të çastit.
Fillimisht në ambientet e lokalit kanë hyrë 5 persona, për të pasuar më pas nga 3 të tjerë më vonë. Shkaku i sherrit ka qenë se një prej tyre nuk ka pranuar t’i japë dorën e t’i flasë një prej djemve në tavolinë.
Pas kësaj, ka nisur debat i rëndë me fjalë banale, e më pas ka përfunduar me përleshje fizike, duke përdorur e sende të forta.
Ka qenë një prej djemve të përfshirë i cili ka dalë jashtë lokalit, ka marrë pistoletën nga automjeti i tij dhe me qytën e armës ka goditur një person tjetër. Pas kësaj dyshohet se ka qenë momenti kur është qëlluar në ajër me armë zjarri, duke mos shkaktuar fatmirësisht të plagosur. Pas të shtënës, të gjithë janë larguar nga vendngjarja me makinat e tyre.
Nga këqyrja e kamerave të sigurisë, uniformat blu kanë arritur të identifikojnë personat e përfshirë në konflikt, një pjesë e të cilëve janë shoqëruar në Komisariat. Gjithashtu edhe dëshmitarët e ngjarjes janë marrë në pyetje.
Sakaq, pjesa tjetër është shpallur në kërkim.
Në përfundim të marrjes në pyetje, pritet që të dyshuarve t’u komunikohet masa e arrestit.
