Një person ka mbetur i plagosur lehtë mbrëmjen e djeshme në autostradën Tiranë-Durrës. Policia tha se njoftimin e ka marrë me dy orë vonesë nga personi që ra pre e plumbave.
“Mbrëmjen e së hënës, rreth orës 21:30 tek nr i emergjencave 112, ka ardhur një telefonat nga shtetasi E. M., i cili njoftin se në autostradën Tiranë-Durrës, një person me motorr e ka qëlluar me armë zjarri”, njoftoi policia e Tiranës.
Shtetasi E. M. ka dëshmuar në polici se: “Rreth orës 19:50, ka qënë duke hyrë për në servis me automjetin e tij tip “Porsche”, kur është afruar një shtetas me një motorr papaq, i cili ka qëlluar në drejtim të tij dhe pasagjerit të automjetit shtetasit K. M.”
Nga të shtënat mbeti i plagosur E.M. Grupi hetimor në vendin e ngjarjes po punon për identifikimin dhe kapjen e autorit të kësaj ngjarje, tha policia.
Brenda 3 ditëve numërohen 4 atentate në vend. Mbrëmjen e së shtunës u vra në atentat, ish-drejtori i policisë, Artan Cuku. Mbrëmjen e së dielës u vra në Vlorë, 35 vjeçari Edison Mehmeti. Policia dyshon për larje hesapesh për drogën. Po në Vlorë në orët e para të ditës së hënë, gjeti tritol në makinë shtetasi Bashkim Brahimaj. Ai shpëtoi atentatit, që ishte i treti ndaj tij.
/Opinion.al
