Një 48-vjeçar në kryeqytet ka rënë në prangat e policisë pasi qëllonte në ajër me pistoletë sportive me fishekë manovër duke krijuar panic tek banorët. Ngjarja ka ndodhur në zonën e Kodrës së Priftit, ndërsa shërbimet e Komisariatit të Policisë Nr. 4, janë njoftuar nga banorët lidhur me ngjarjen. “Nga verifikimet e shpejta dhe bashkëpunimi me qytetarët u bë e mundur identifikimi, kapja dhe arrestimi në flagrancë për veprat penale të “Prodhimi dhe mbajtja pa leje e armëve të gjuetisë dhe sportive” dhe “Prishja e qetësisë publike”, i shtetasit: A. G., 48 vjeç, banues në lagjen “Kodra e Priftit”. Gjatë kontrollit në banesën e 48-vjeçarit, shërbimet e Policisë gjetën dhe sekuestruan në cilësinë e provës materiale 4 pistoleta sportive të llojeve dhe markave të ndryshme që përshtaten edhe si armë zjarri si dhe një shotgun me shënjestër optike, pa lejen përkatëse”, njofton policia.
Gjithashtu u sekuestruan në cilësinë e provës materiale edhe 6 gëzhoja që ky shtetas kishte qëlluar me fishekë manovër, duke terrorizuar banorët./Opinion.al
