Tifozët belgë e kanë marrë me sportivitet humbjen ndaj Italisë. Kujtojmë se Kombëtarja e Roberto Mancinit fitoi 2-1 ndaj “Djajve të Kuq” në çerekfinalen e Euro 2020, duke arritur kështu një sukses të merituar.
Nga ana tjetër urimet nga kampi kundërshtar nuk kanë munguar për Italinë, teksa disa tifozë të Belgjikës kanë nisur një peticion për riluajtjen e ndeshjes!
Pse? E gjitha ironi dhe tallje ndaj veprimit të francezëve. Kampionët e botës u eliminuan në raundin e 1/8-ve nga Zvicra pas goditjeve të penalltive.
Yann Sommer priti penalltinë e Kylian Mbappe dhe kaloi helvetët në çerekfinale. Në Francë u kapën me lëvizjen e portierit në momentin që po godiste ylli i PSG-së.
Parregullsi e cilësuan tifozët francezë veprimin e Sommer dhe mbi 270 mijë firma u mblodhën që të përsëritej ndeshja Francë-Zvicër.
Një pretendim ky i cili shkoi kot, pasi asgjë nuk ndryshoi. “Të riluhet ndeshja Belgjikë-Itali, në mënyrë që të humbasim përsëri. U mposhtëm nga më të fortët, qëllimi është që ata (Italia) ta konfirmojnë se janë realisht skuadra më e fortë“.
Tifozët belg e morën këtë nismë për t’u tallur me francezët, të cilët besuan realisht në një moment që mund të përsëritej ndeshja me Zvicrën.
