Ish-kryeministri Sali Berisha bëri thirrje që shembja e teatrit duhet të shndërrohet mosbindje civile nga ana e opozitës.
Në një prononcim për mediat gjatë protestës për Teatrin Kombëtar, Berisha tha se ai ishte monument kulture që nuk duhej të prekej kurrë. Sot nuk ka drejtësi sipas ish-kryeministrit Berisha dhe se qeveria qëndron në pushtet sepse po i lë populli por kjo nuk duhet të vijojë më kështu sipas tij.
“Teatri ka qenë monument kulture, nuk mund të prekej kurrë. Për të gjithë ata që njohin historikun e Tiranës, ishte simboli më i çmuar i kryeqytetit. Që të gjitha të tjerat janë inferiore krahasuar me Teatrin, që ishte vepër e një arkitekti të mirënjohur. Ka një histori nga më të pasurat kulturore të vendit, ishte gjatë diktaturës institucioni më antikonformist i mundshëm, në një kohë kur të tjerët bënin filma për Lej Fenin, Teatri shfaqte Hamletin apo Romeo e Zhuljetën. Kur kollosët e artit internoheshin, Kristaq “Xhelati” gdhendte bustet e Enver Hoxhës dhe i biri tani bëri atë që nuk guxoi të bënte as Enver Hoxha.
Shembja është kushtrim për opozitën dhe marshin që ka nisur, ta shndërrojë në mosbindje civile totale deri në rrëzimin e narkodiktaturës. Rama ka krijuar një polici barbare, nuk ka drejtësi. Sot, qytetarët kanë vetëm një mbrojtje: guximin e tyre. Në vend të zyrës, Ramës t’i japin Lanën. Nëse nuk e bëjnë këtë, Shqipëria do të shkojë poshtë e më poshtë. Sot përveç Zotit dhe guximit të tyre nuk kanë asnjë mbrojtje tjetër. Skena të tilla kam parë vetëm në 1990. Le ta nisim këtë betejë. Duhet të bashkohemi të gjithë.
Ftoj cdo shqiptar të bashkohen. Një socialist më thoshte, m’u këptë dora që votova për atë. Më tha doktor të kërkoj të falur që votova atë. Këta rrinë se i lamë ne, por ne nuk duhet ti lëmë, të paguajmë cdo çmim për të çliruar Shqipërinë. Të gjitha format e mosbindjes civile. Qytetarët nuk kanë më ligje dhe drejtësi, armën më të fuqishme kanë guximin e tyre”.- tha Berisha. /Opinion.al
