Një qytetar i shkruan kryeministrit Edi Rama se i ka “ngelur ora te pasaporta europiane, ndërkohë që Shqipëria është boshatisur nga të rinjtë dhe rrezikon humbja e identitetit”.
“Duam program, kanë ngelur vetëm djemtë e babit në Shqipëri. Të mbushen shtëpitë me nipër e mbesa, të na mbrohet gjuha shqipe, fëmijët po humbasim identitetin”, ishte komenti, të cilit kreu i qeverisë iu përgjigj në rubrikën e tij “Sy m’Sy”.
“Ora nuk më mbeti mua te pasaporta europiane, por ora e historisë së vendit tonë ka qenë gjithmonë e lidhur me pamundësinë për të qenë e barabartë, në këtë kontinent ku jemi në zemër të Europës. Ku shqiptarët kanë vuajtur e janë poshtëruar historikisht, kjo është ora e historisë sonë. Sot, ora e historisë sonë, ka këtë mundësi! Është hapur dera se ne kemi bërë më së miri detyrat tona.
Dje isha në Sarandë dhe ishte kënaqësi e rrallë me një grup me 50, 60, 70 veta ku shumica dërrmuese ishin të rinj që janë kthyer me sukses nga ato vende që kanë qenë. 16 mijë votues ka Saranda në listë, që janë të rritur dhe mund të votojnë, dhe 1 në 4 e ka sipërmarrës. E kuptove i dashur që realiteti është shumë më ndryshe nga propaganda e kënetës?! Këneta e atij që punon e lufton vetëm për veten e tij, e mban peng një forcë që lindi si shpresë dhe sot është një kënetë e mbaruar. Gjuha shqipe duhet mbrojtur patjetër dhe ne po bëjmë shumë punë për këtë. Ne e fuqizuam duke shtuar orët e duke e futur në një nivel të studimit që nuk ekzistonte?!”, argumentoi Rama.
