Refuzimi i babait të saj për t’u lidhur me një emigrant afgan, i preu jetën në mes. Anxhelina Petro nga Berati, u dhunua për vdekje nga babai i saj. Ngjarja e rëndë ndodhi në Korfuz të Greqisë mbrëmjen e 2 Janarit. 29-vjeçarja u qëllua nga babai i saj Aleko Petro me shufër hekuri në kokë, çka i shkaktoi asaj vdekjen. Më pas, i ati e varrosi atë në oborrin e pasmë të shtëpisë. Veprimi i 52-vjeçarit ka revoltuar edhe familjarë e të afërm të Anxhelina Petros. Vajza e dajës së 29-vjeçares, Valbona S. është e pikëlluar nga ky veprim.
“O zemra ime ti o Lina të mori më qafë o shpirti im s’kam fjalë të përshkruaj”, komenton ajo në Facebook në një fotografi të Anxhelina Petros.
29-vjeçarja kohët e fundit bashkëjetonte me të dashurin e saj afgan. Aleko Petro refuzonte këtë lidhje të vajzës së tij dhe vazhdimisht kishte grindje mes tyre. Mbrëmjen e 2 Janarit, ka qenë i dashuri i Anxhelinës që dha alarmin në polici për zhdukjen e shqiptares, pasi nuk kishte shkuar as në punë. Disa orë më vonë, policia arrestoi babain e Anxhelinës si person të dyshuar. Në oborrin e shtëpisë autoritetet gjetën të varrosur 29-vjeçaren.
Gjatë marrjes në pyetje, Aleko Petro pranoi autorësinë e krimit të rëndë dhe rrëfeu se ka vrarë vajzën e tij. Motivet janë mospëlqimi për lidhjen e saj me emigrantin afgan. Anxhelina Petro jetonte prej vitesh në Korfuz me babain e saj, ndërsa e ëma është divorcuar. 29-vjeçarja punonte si kamariere në një lokal në këtë ishull. /tvklan.al
