Pas protestës së zhvilluar sot në Tiranë për vrasjen e 25-vjeçarit Klodian Rasha, ka reaguar Komisioneri për Mbrojtjen nga Diskriminimi.
Përmes një deklarate në “Facebook”, Komisioneri për Mbrojtjen nga Diskriminimi shprehet se përfshirja e të miturve në situata që degradojnë në përplasje të dhunshme me Policinë e Shtetit mund të rezultojë në përvoja traumatike.
KMD fton prindërit të mos lejojnë fëmijët e tyre në këto protesta pasi mund të përballen me trauma dhe rënda dhe i kërkon policisë të zbatojë protokolle të veçanta për ta.
“Përfshirja e të miturve në situata që degradojnë në përplasje të dhunshme me Policinë e Shtetit mund të rezultojë në përvoja traumatike, kundërvajtje penale dhe me rrezikshmëri për integritetin e tyre fizik dhe psikologjik. Për këtë arsye, Komisioneri për Mbrojtjen nga Diskriminimi vlerëson që fëmijët e mitur të këshillohen nga familjarët e tyre për pasojat e përfshirjes në akte te dhunshme dhe incidente me policinë. Po ashtu, KMD i bën thirrje Policisë së Shtetit të zbatojë protokolle të veçanta për përballjen me të miturit në protesta apo shoqërime në rajone policore, duke ofruar shërbim të shtuar të punonjësve socialë dhe psikologëve”, shkruhet në njoftimin e KMD./ Opinion.al
