Tre persona janë vënë në pranga nga policia pasi të maskuar goditën me sende të forta një 42 vjeçar në Sarandë. Ngjarja ka ndodhur në lagjen nr.4 të qytetit bregdetar, për motive të dobëta.
Bazuar në informacionet e marra në rrugë policore, u bë kapja e S. P., 57 vjeç, A. H., 40 vjeç dhe E. P., 29 vjeç, të tre banues në Sarandë.
Sipas policisë, dy prej të arrestuarve rezultojnë emra të njohur për drejtësinë. Bëhet fjalë për 57-vjeçarin S.P., i cili rezulton të jetë i dënuar më parë për vrasje ndërsa 40-vjeçari A.H., rezulton të jetë i dënuar më parë për vjedhje me armë.
Këta persona gjithashtu kanë kryer veprime për të penguar zbardhjen e ngjarjes, duke fshehur automjetin e përdorur në këtë ngjarje, i cili është gjetur dhe sekuestruar nga Policia, së bashku me 1 automjet tjetër.
Gjatë kontrollit të ushtruar në banesat dhe në 2 automjetet që ata posedonin, shërbimet e Policisë gjetën dhe sekuestruan në cilësinë e provës materiale 1 përforcues grushti, 1 shkop metalik, 1 jelek muntifuksional, 3 palë doreza, 2 maska, 3 palë targa automjeti dhe 1 targë motori, 2 thika, 1 aparat për bllokim valësh, 7 aparate celulare, 10 karta SIM shqiptare dhe greke, 1 peshore elektronike, 210 gr lëndë e dyshuar narkotike cannabis sattiva, 9 fishekë dhe një shumë parash në euro dhe lekë.
Materialet i kaluan Prokurorisë pranë Gjykatës së Shkallës së Parë Sarandë, për veprat penale “Plagosja e rendë me dashje”, e kryer në bashkëpunim, “Mbajtja pa leje e armëve dhe municioneve luftarake”, “Veprime që pengojnë zbulimin e së vertetës”, “Kanosja”, “Mbajta pa leje e armëve të ftohta” dhe “Prodhimi dhe shitja e lëndëve narkotike”./Opinion.al
