Një situatë e tensionuar është krijuar para Parlamentit, ku opozita u mblodh për të protestuar ndërsa deputetët e shumicës ishin sallë në seancë. Një grup manifestuesish tentuan të çajnë kordonin e policisë të vendosur në hyrjen kryesore të oborrit të Parlamentit, por u sprapsën nga përdorimi i gazit lotsjellës. Disa manifestues u përgjigjën më pas duke hedhur gurë ndaj policisë.
Opozita e nisi protestën ndërsa brenda në sallë zhvillohej një seancë jashtë radhe. Disa mijëra përkrahës të Partisë Demokratike dhe LSI-së u mblodhën me urgjencë për protestën, sapo kryesia e Parlamentit ndryshoi datën e seancës. Ky është tubimi i tretë brenda 10 ditësh që zhvillon opozita, duke kërkuar dorëheqjen e kryeministrit Edi Rama dhe zgjedhje të parakohshme.
“Ne nuk frikësohemi. Ne luftojmë për një mision të madh, për fëmijët shqiptarë dhe për të nesërmen e tyre europiane. Ne luftojmë për zgjedhje të lira e të ndershme dhe përballë kemi një shtet që nuk është më i shqiptarëve, një Republikë të krimit, të cilin do ta shembim nga themelet. Ky vend ka dy rrugë, të pranojë skllavërinë nën Maduron e Ballkanit, ose të ngrihen të gjithë si një trup, toskë e gegë, myslimanë dhe të krishterë, demokratë e socialistë dhe të marrim në dorë fatin tonë. Beteja është pa kthim dhe historia e gjatë dhe e shkurtër na rrëfen si do përfundojë kjo betejë me shporrjen e qeverisë së krimit”, tha Basha pas përplasjeve./ Opinion.al
