Teksa u ngjit në një shkëmb në det për t’i ikur flakëve që afroheshin, Jaimie-Marie Degge bëri telefonatën që ajo besonte se do të ishte e fundit.
30-vjeçarja nga Britania telefonoi babain e saj, i cili po kujdesej për dy vajzat e vogla në Londër.
“Doja të flisja me të që t’a porosisja të vajzat e mia të më mbanin mend. I thashë, baba, të lutem sigurohu që fëmijët e mi të rriten bashkë. Sigurohu që ta duan njëri-tjetrin siç i dua unë. Mos lejo kurrë që të më harrojnë. Sigurohu që ta dinë që i dua shumë”.
Degge kishte shkuar bashkë me nënën e saj për pushime, kur u rrethuan nga flakët në shtëpinë e tyre në fshatin Mati.
“Po ulërija dhe po qaja. I thashë babait që nuk do të dal e gjallë nga këtu, nuk ka asnjë rrugëdalje. Nuk mendoja se do t’i shihja fëmijët e mi sërish”, rrëfeu për mediat britanike nëna 30-vjeçare, shkruan tvklan.al
Fatmirësisht ajo u shpëtua nga një varkë. Nga ana tjetër, edhe prona e nënës së saj i shpëtoi flakëve, e vetmja në atë rrugë që mbeti në këmbë.
