Ashtu si gjatë sezonit veror edhe në këto ditë të fundit të vitit turistët italianë kanë zgjedhur Shqipërinë për të pushuar.
Shumë qytetarë nga vendi fqinj do t’i kalojnë festat në qytetin bregdetar të Durrësit.
“Kanë vendosur ta festojnë Vitin e Ri në Shqipëri, kanë marrë një paketë 3-ditore, pra vijnë me datë 30 dhe ikin me 2 Janar. Kanë preferuar ta festojnë këtu.”
Interes ka patur edhe nga turistë nga vende të tjera europiane. Ndërsa në ditën e parë të vitit 2024 kanë rezervuar vizitorë nga Kosova.
“Këtë vit kemi shtetas italianë që janë një risi dhe shtetas sllovenë si dhe shtetas bullgarë që janë të përhershëm. Pastaj kemi vendasit që nuk e festojnë në shtëpi, por vijnë në restorante. Më datë 1 kemi shtetasit nga Kosova që vijnë për festuar në Durrës.”
Për të pritur sa më mirë turistët bashkia e qytetit ka bërë gati një sërë aktivitetesh. Kalendari i pasur do të kulmojë në datë 24 Dhjetor me koncertin e fundvitit.
“Ajo që është e rëndësishme për ne si Drejtori e Turizmit është organizimi i koncertit me muzikë live dhe kjo do zhvillohet përgjatë bulevardit, një ditë para Krishtlindjeve kështu që i ftoj të gjithë qytetarët dhe turistët të bëhen bashkë me ne. Të festojmë sëbashku!”
Autoritetet i kanë kushtuar vëmendje edhe zbukurimit të qytetit me dekor të veçantë dhe dritat ndriçuese./Klan News
